1Th 2 | KYG | STEP | Konagatimogitapae, huta, lapakaemo ago lage'nayana lapakaetegamo uta mai'netae'mo afa ali'ya'mo o'ali'nopa ali'ya'mo ali'nonageno'ae'mo ne'ya'mo afole ai'niye.

1 Thessalonians 2

Polo'a Tesaloniyani vaya'aitegamo uno ali'ya'mo ali'niya kavafe'mo ava gemo hu'niya gemae

1 Konagatimogitapae, huta, lapakaemo ago lage'nayana lapakaetegamo uta mai'netae'mo afa ali'ya'mo o'ali'nopa ali'ya'mo ali'nonageno'ae'mo ne'ya'mo afole ai'niye. 2 Lapakaemo ago afi'nayana Filipai taonifi'mo nagae'e Silivenisi'e'mo u'no'age'a lusi kava hu'a la'amagi'naya'monanafa lapakaetegamo u'no'ae. La'agae'e Timoti'e'mo uta mai'nonageno Goti'a laha maeno lokiya vaino late'nige'apae'mo mago vaya'mogi lusi kava hu'a kame hu'a late'naya'monanafa koli osuta Gotitegati alagepa faigoko ge'amo aliniteta aeta hakalo huta lapa pai'none. 3 Lapa pai'nona gemo aigofe gefati'mo afole o'aige amega lagufale'mo lamogaga aisuna agufa kavateti'mo afole o'aige humi'nami getileti'mo afole o'aige huno afole o'ai'niye. 4 Afole o'ai'niya'monanafa Goti'a lageno aeto huteno'ae'mo alagepa faigoko ge'ale'mo yagaita ate'neta ali'ya'amo alisunafe'mo lekana paino late'nigeta mai'none. Ali'ya'amo ne'aluna'mofe'mo vaya'mogi amuse hu'a latesaya agufa gemo osuta Goti'a laipafi'mo lageno alino fako huno nelateya vekamo'a amuse huno latesiyafeke'mo mani gemo nehune. 5 Lapakaemo ago afi'nayana aigofe gemo huta lahao ke hesayafe'mo huta lapao ke ose'none. Mago vaya'mogi hapa'ye nehiya kava'apile'mo ge'apileti'mo hu'a ae'a ati kaeya agufa gemo osu'none. Goti'a ago lage'niyanageno laha maesiya faigoko gemo afa'a hugiye. 6 Lagaemo lapakaemofi muki alu vaya'mogimofi hu'a lagitile'mo ali'a asaga hu'a latesayafe'mo mago kava'mo osu'none. Kalaisi apa vaya'amo mai'neta lokiya'amo ali'nona'mofe'mo lapakaefe'mo, ina ya'mo lamiyo, huta huge mani ali'ya'mo alitapa lateyo, huta huge hisuna agufa gemo afa'a hane'niya'monanafa lapa opai'none. 7 Lokiya gemo osuta lapakae'e'mo magokepi kanale huta lokaeta mai'netae'mo vase vase kava'mo nehuta a'nemogimo inamu mafa'nemo apanu ki'a alagi hu'a ne'maiya kava huta yagaita lapate'none. 8 Lapakaefe'mo lahau'niya'mofe'mo Gotitegati alagepa faigoko ge'age'mo alita lapamisunafe'mo osu'nopa lagufa'a'e'mo alita lapamisunafe'mo hu'none. 9 Konagatimogitapae, huta, alagepa faigoko gemo aeta hakalo huta lapa paita mai'netae'mo laha maetapa kanamo o'alisayafe'mo feluga'e hani'ilaga'e'mo lokiya vaita ali'ya'mo ne'alunagetapa ago lage'nae. 10 Lagaemo lapakesa afita fatago nehaya vaya'mogitapa'e'mo lokaeta mai'netae'mo Gotitegamo alagepa kava'mo huge vaya'aitegamo alagepa kava'mo huge vai'mo olamisaya agufa kava'mo huge huta mai'nonagetapae'mo lapakae'e Goti'e'mo ago lage'nayanagetapa laha maesiya faigoko gemo afa'a hugae. 11 Afo'apimogimo mafa'ne'apile'mo yagai'a ne'apataya kava huta lapakaete'mo yagai'neta ani kava'mo hiyo, huta huge lapaipamo alita lokiya vaita lapatege lokiya gefati'mo lapa paige huta mai'nonagetapa lage'nae. 12 Goti'a yagaino ne'apateya kote'mo haitapa mai'netapae'mo ha le konali ya'amo alisayafe'mo keya aeno ge hu'niya vekamo'a hau'niya kava'mo hisayafe'mo lapakaetegamo ani kava'mo hu'none.

13 Goti ge'amo lapa pai'nonagetapa afitetapae'mo, ma mopafi vaya'ai gemo ohane'nifa Goti ge'amo hane'niye, hutapa hu'naya'mofe'mo Gotifeke'mo hao ke hege hege huta mai'none. He, lapakaemo lama gemo hu'nae. Afi'naya gemo Goti ge'age'mo hane'niye. Mani gemo'a lapakesa afitapa fatago nehaya vaya'mogitapa lapaipafi'mo lokiya vaino ali'ya ne'aligeno'ae'mo ne'ya'mo afole ne'aiye. 14 Yutiya kotega vaya'mo Kalaisi Yesupi'mo mai'naya siosi vaya'mogimo kanamo ali'nae. Yu vaya'mo vaya'apimogi kanamo ali'a apami'naya kava hu'a vayatapimogi kanamo ali'a lapami'nae. Konagatimogitapae, huta, ani kava'mo hutapa mai'netapae'mo Goti siosi vaya'amo apakame hutapa mai'nae. 15 Yu vaya'mogimo akeya'vilaga Gotitegati gemo alini e'a ae'a hakalo hu'a hapa nepaiya vaya'apimo kamiti apamagige Ala kava ne'mo Yesu'a kamiti amagige hute'apae'mo hemenimo lagaefe'mo apaini hu'a nelatae. Apakaemo Goti'a alagi ohau'niya agufa kava'mo nehu'apae'mo muki vaya'aife'mo kame hu'a ne'apatae. 16 Lagaemo Yu nofi vayapati o'mai'naya vaya'aife'mo ge hisunageno Goti'a apakufamo alino katino apatesiya ka'mo ali'a akani ne'malae. Muki afina'mo ani kava'mo nehageno'ae'mo hosu kava'apimo'a lusi kava huno havai te'niye. Goti'a apakava mai'niya'monanafa hemenimo aipamo leno ne'apateya kayo'mo apami'niye.

Polo'a, lapakaefe'mo halate u'na lapakegefe huve, huno hu'niya gemae

17 Konagatimogitapae, huta, vaya'mogimo ali'a laha faitalageta lapataleta aise afina'mo laote mai'nona'monanafa lapakaefe'mo lagesamo afita ne'maune. Halate lapakaefe'mo uta lapakesunafe'mo lusi kava huno lahau'nigeta uta lapakesuna kafe'mo layamukiki huta kahauya nehune. 18 Lapakaetegamo ugefe nehutae'mo nagaemo Polo'namo alu afina alu afina'mo ugefe hu'novana Satani'mo ka akanino late'niye. 19 Ala kava netimo Yesu Kalaisi'a eminesiya afinafe'mo agava mai'neta lavayagunagu huge lamogaga aige miyatimo alisunafe'mo lamogaga aige nehuna kava'mo aepa vaya'mo ina lagiye. Lapakaitapigemae. 20 Kalaisi aulagale'mo mai'netae'mo lapakaeteti'mo ala lagitimo aliteta lamogaga aigune.